Fòram na Gàidhlig

... is cuir ann am bogsa le bomba i

Bi faiceallach leis na faclan sin (bomba). A bheil thu cinnteach nach urrainn don CIA Gàidhlig a thuigsinn?
'S coltach gu bheil iad a' leughadh seo a-nis.
Gu fortanach, chuir mi orm m'ad fhoil agus cha bhi iad a' leughadh m'inntinn.

Uill, feuchamaid "stuth-sprèadhaidh". Is dòcha gu bheil duilgheadas aca le faclan fada

Air aithris le Daibhidh Eyre, saoil?

Nach e Innis Tìle ⁊ na h-Eileanan Fàro a tha san Roinn-Eòrpa?

Tha an t-iasgach 'na chuspair tiomnaichte do Phàrlamaid nan Eilean Fàrothach, saoilidh mi.

Beagan fealla-dhà uam-sa an triob seo:

Bha cìobair a-muigh a’ glèidheadh a threud ann an àite iomallach. Gu h-obann, nochd BMW ùr nodha ʼs thàinig e thuige aig astar. Stob fear òg a cheann a-mach air an uinneag ʼs deise Armani, brògran Gucci, speuclairean-grèine Ray Ban agus tàidh YSL air agus mhol e an latha dhan chìobair. Ach an uairsin, dh’fhaighnich e “Nan innsinn dhuibh cò mheud caora th’ agaibh a-seo ʼnur treud, an doireadh sibh tè dhomh?”

Choimhead an cìobair air a threud agus an uairsin air an fhear òg gu ciùin ʼs fhreagair e “Seadh, siuthad ma-tà”.

Leum an yuppie a-mach às a’ chàr, thug e a-mach laptop, rinn e ceangal ris an eadar-lìon leis an fhòn-làimhe aige, fhuair e greim air co-chomharran an àite far an robh an dithis slighe GPS. Bhris e a-steach air saideal NASA an uairsin ʼs rinn e dealbh fìor mhionaideach dhen àite far an robh an treud.

Dh’fhosgail e an dealbh ann am Photoshop an uairsin ʼs chuir e lethbhreac dheth gu ionad grafaigeachd sa Ghearmailt. Mionaid as dèidh sin, fhuair e post-d air an fhòn-làimhe aige le dàta a’ mhion-sgrùdaidh a rinn na Gearmailtich air an dealbh. Chuir e a-steach an dàta ann an Excel spreadsheet a tha co-cheangailte ri stòr-dàta MySQL slighe ODBC leis na ceudan de dh’fhoirmlean toinnte. Greiseag as dèidh sin, fhuair e toradh an àireamhachaidh agus rinn e clò-bhualadh dheth air 150 duilleag làn-dathte air Micro HP Laser Printer. Choimhead e air, thionndaidh e ris a’ chìobair ʼs thuirt e ris “Tha 1586 caor’ agaibh”.

“A shaoghail, tha thu ceart. Siuthad ma-tà, thoir leat aonan dhe na caoraich agam”. Choimhead e air an fhear òg ʼs e a’ taghadh caora agus a chur ann am boot a’ chàr le fiamh-ghàire.

Nuair a thionndaidh am fear òg ri falbh, thuirt an cìobair ris “Saoil, nan innsinn-sa dhut-sa dè dìreach an dreuchd a th’ agad-sa, am faighinn air ais mo chaora?”.

Chnuasaich am fear òg seo mionaid agus dh’aontaich e an uairsin.

“ʼS e consultant a th’ annad”, thuirt an cìobair.

“Murt, ciamar fon ghrèin a dh’fhiosraich sibh seo?”

“Cha robh duilgheadas sam bith ann. Nochd thu seo gun duin’ ag iarraidh ort tighinn, ag iarraidh tuarastal air freagairt a bh’ agam mu thràth, air ceist nach do dh’fhaighnich mi dhìot is gun spùt agad mu mo dhreuchd-sa... nise, nach till thu dhomh mo chù?”

Sgoinneil gu dearbh!
Chuala mi sin san Ruisis, ach saoil mi gu bheil e fada nas éibhinne sa Ghàilig.

Ò àidh, bha sin dol cuairt ann an iomadh cànan. Tha cuid mhath dhe na rudan san t-sreath seo o dhaoine eile, chan eil mi ach a' cur Gàidhlig orra

Nise, bheil sibh eòlach air ollamh?

Bha deasbad againn air Facebook uaireigin le Maighread Stiùbhairt air beachdan dhaoine air na Gàidheil 's dè cho realistic 's a tha iad. Tha an dealbh mu dheireadh caran tongue in cheek

akerbeltz wrote:Tha an dealbh mu dheireadh caran tongue in cheek

Feumaidh gu bheil oir tha a' ghrian ann

Nach eil sinn uile eòlach air an fhaireachdainn ud...

Tha sin car coltach ri togalach Sabhar Mòr Ostaig, nach eil?

Sin mar a tha e!

Fear ùr: