Fòram na Gàidhlig

Carson a tha cuid a' caolachadh ainmean àite ach chan eil cuid eile?

Mar eisimpleir.

Sgoil Dhalabrog

Sgoil Dhalabroig

Gheibh sinn Àrd-sgoil Steòrnabhaigh, agus Bunsgoil Tholastaidh...ach ann am faclair eile (Akerbeltz) 's e Bunsgoil Tholastadh, Sgoil Ulapul a tha ann.

Sin dòigh an t-saoghail. Gu ceart, 's e an tùiseal ginideach a th' ann an seo leis na h-ainmean-àite. Ach, uill, tha beagan leasachaidh ann mu na riaghailtean agus cha chùm a h-uile duine leis an t-seann riaghailt. Sgoil Bhirminghaim? Oilthigh a' Chaisteil Nuaidh? Bunsgoil Mhoretonhampsteid?

An riaghailt a dh'ionnsaich mise 's e gur e Sgoil Dhalabroig a th' ann.

Co-dhiù, canar Sgoil Dhùn Èideann is chan ann Sgoil Dhùin Èidinn.

Is urrainn do dh'ainmean-àite a bhith caran idiosyncratic chanainn-sa

Tha cuid a dh'iar-leasachain Lochlannach ann an ainmean-àite a tha *cha mhòr* 'nan ainmearan coitcheann. Mar eisimpleir tha bàgh ann mar fhacal neo-eisimeileach:
Bàgh a' Chaisteil, Bàgh an Òbain, Bàgh Bhatarsaigh...

Mar sin dheth, ma nochdas sin mar fhreumh aig deireadh facail, leanaidh sin ris a' phàtran àbhaisteach (am bàgh > a' bhàigh; -bagh > -baigh) mar gum b' e compound noun a bhiodh ann:
#######bhagh > ######bhaigh

Tha badan beag de dh'iar-leasachain ann a nì seo ('s mathaid gu bheil feadhainn eile ann, seo an fheadhainn a bhuail orm an-dràsta fhèin):
-b(h)agh > b(h)aigh
-b(h)rog > b(h)roig
-b/p(h)ul > b/p(h)uil
-d(h)al > d(h)ail
-b(h)ost > b(h)oist

Feumaidh gun robh fios aig daoine aig àm dè chiall a bh' ann dhaibh agus gun do mhair seo beò le cuid a mhìrean a tha anabarrach cumanta air a' Ghàidhealtachd ged nach bi fios aig mòran tuilleadh dè th' ann am "brog"

Bunsgoil Tholastadh, Sgoil Ulapul

Oops, taing... cuiridh mi ceart sin...

Tapadh leat, Akerbeltz. THa sin fiosrachail agus inntinneach.
Tha fios agam gur e Dhalabroig a chanas daoine, oir dh'fhaighnich mi de Ghàidheil mar a dh'fhuaimnicheas iad e, agus b'ann le caolachadh a labhair iad e.