Geama tòimhseachain - Me & My Shadow

Naidheachdan   -   News

Leum gu duilleag:
Inbhir RSS airson na duilleige seo
Sealladh clò-bhualaidh Dèan ceangal dhan naidheachd seo

Tha an deasaiche video Shotcut ri fhaighinn sa Ghàidhlig a-nis


Tùs: Fòram na Gàidhlig
Roinnean-seorsa: Bathar-bog - Software
shotcut-screenshot1.png
'S e deasaiche video airson Windows, Mac agus Linux a th' ann an Shotcut a tha saor is open source. Is na gleusan as cudromaiche aige gun cuir e taic ri roghainn fharsaing dhe dh'fhòrmatan; nach eil feum air ion-phortadh ach an deasaich thu an loidhne-ama leis an fhaidhle tùsail sa bhad; taic ri Blackmagic Design gus sùil a chumail air an ion-chur 's an ro-shealladh; agus taic ri dùmhlachd-bhreacaidh suas ri 4k.

Gheibh thu e an-asgaidh air shotcut.org.

Sealladh clò-bhualaidh Dèan ceangal dhan naidheachd seo

Stellarium ⁊ briathrachas reul-èolais


Tùs: Fòram na Gàidhlig
stellarium-screenshot1.png stellarium-screenshot2.png stellarium-screenshot3.png
On a tha sinn dìreach air grian-stad an t-samhraidh a chomharrachadh (no àm na Nollaige mas e Crìostaidh a th' annad), thàinig an t-àm gus pròiseact a bhrosnachadh a thòisich mi ag obair air o chionn cha mhòr ceithir bliadhna. 'S e seo ach Stellarium, bathar-bog amharc-lann phlanaidean a sheallas na chì thu nuair a choimheadas tu air na reultan. Tha e furasta cleachdadh, open source agus saor 's an-asgaidh.
Seallaidh Stellarium na speuran ann an dòigh fhìor-riochdail 3D mar a chìtheadh tu le do shùil lom no le prosbaig iad. 'S urrainn dhut a chleachdadh air a' choimpiutair agad fhèin no ann an amharc-lann phlanaidean agus gabhaidh fiù prosbaig a stiùireadh leis. Seo cuid dhe na gleusan a bheir Stellarium dhut:
  • Corr is 210 millean reul
  • Buidhnean reultan is sgead-dhealbhan nan reul-bhadan airson 20+ dualchas eadar-dhealaichte
  • Slighe Chlann Uisnich fhìor-riochdail
  • Dubhraidhean, èirigh is laighe na grèine
  • Na planaidean is na saidealan aca
  • Rionnagan-earbaill
  • Dealbhan de dhearganan-doireann (catalog Messier slàn)
  • Mòr-nòbhathan
  • Gabhaidh gnàthachadh

Ged a tha an eadar-aghaidh gu lèir ri a faighinn sa Ghàidhlig a-nis, tha obair ri a dèanamh fhathast gus eadar-theangachadh nan ainmean reultan a thoirt gu buil (tha corr is 2500 dhiubh ann is an t-eadar-theangachadh mu letheach slighe aig an àm seo) ach tha mi 'n dùil gu bheil an fheadhainn Shiarach coileanta a-nis.

Gheibh thu Stellarium o stellarium.org e.

Briathrachas reul-eòlais

Gus Stellarium eadar-theangachadh, rinn mi rannsachadh air briathrachas reul-eòlais, a' cleachdadh nan tùsan a tha air Duilleag "Na speuran" an t-Sàbhail Mhòir. Chuir mi toraidhean an rannsachaidh agam air loidhne mar fhaidhle csv (còdachadh: Siarach, Windows). Gabhaidh am faidhle fhosgladh le LibreOffice Calc no Microsoft Excel, mar eisimpleir.

Sealladh clò-bhualaidh Dèan ceangal dhan naidheachd seo

Tha an geama Widelands ri fhaighinn sa Ghàidhlig a-nis


Tùs: Fòram na Gàidhlig
Roinnean-seorsa: Geamannan - Games
widelands_screenshot_01.png widelands_screenshot_03.png widelands_screenshot_02.png widelands_screenshot_04.png
'S e geama ro-innleachd togail fìor-ama saor is open source a th' ann an Widelands le iomairtean aon-chluicheadair agus modh ioma-chluicheadair. Thug Settlers II™ (© Bluebyte) beachd air a' gheama seo dhuinn o thùs ach tha e mòran nas iom-fhillte is domhainn.
Tha thu 'nad cheannard cinnidh bhig. Is do dhleastanas tuineachadh thogail. Nì do mhuinntir obair gus barrachd stòrasan a chruinneachadh airson cur ris an fhàs.



Bheir Widelands modh aon-chluicheadair dhut le iomairtean a dh'innseas sgeulachdan nan treubhan agus an còmhstri ann an saoghal Widelands. Gidheadh, cha tòisich an tuineachadh dha-rìribh mus cluich thu còmhla ri do charaidean air an eadar-lìon no lìonra ionadail gus impireachdan ùra a thogail còmhla – no càch a chèile a cheannsachadh air a' bhlàr. Bheir Widelands inntinn fhuadain dhut cuideachd gus dùbhlan a thoirt ort.



Gheibh thu Widelands air widelands.org.

Sealladh clò-bhualaidh Dèan ceangal dhan naidheachd seo

Ceitidh, an guth Gàidhlig TTS ri fhaighinn mar demo


Tùs: Fòram na Gàidhlig.
Air a lorg le: akerbeltz
cereproc-logo.png
Tha guth Cheitidh - seo teacsa 'na chainnt ann an Gàidhlig - ri fhaighinn air làrach-lìn Cereproc mar demo a-nis. Leughaidh Ceitidh teacsa sam bith a tha sa Ghàidhlig dhut!

Ceitidh's voice - that's text to speech on Gaelic - is available on the Cereproc website as a demo now. Ceitidh will read any Gaelic text to you!


Gus èisteachd ris a' ghuth, tagh "Ceitidh (Gaelic, Scotland)" - feumaidh tu sgroladh sìos air an duilleag 's an earrann Gaelic a lorg - sgrìobh no cuir ann an teacsa agad an uairsin agus brùth air a' phutan cluiche.

In order to listen to the voice, select "Ceitidh (Gaelic, Scotland)" - you will have to scroll down the page to the Gaelic section - then type or paste your sentence and press play.

Sealladh clò-bhualaidh Dèan ceangal dhan naidheachd seo

Tha Rèidio Guth nan Gàidheal a' sireadh taic


Tùs: Fòram na Gàidhlig.
Air a lorg le: sr3nitygirl
ameireagalogo.png
Tha Rèidio Guth nan Gàidheil a' sireadh daoine a chuireas ris na prògraman aca. Gheibh thu barrrachd fiosrachaidh air mar a thèid thu an sàs ann air an làrach-lìn aca.
Às-earrann:
Fhad 's a bhios Guth nan Gàidheal a' faighinn deiseil airson craolaidh, bidh buidheann beag saor-thoileach trang a' deasachadh ar prògraman toiseachail.

Chaidh Guth nan Gàidheal a chur air chois mar phròiseact saor-thoileach, le buill ACGA agus daoine eile nach eil an lùib anns a' bhuidheann ach aig a bheil ùidh anns a' Ghàidhlig 's iad a' dealbhachadh prògraman gus toileachas fhaotainn dhan a h-uile duine asta.

Agus 's urrainn dhutsa ar cuideachadh.

An do smaoinich thu riamh air craoladh réidio no am pod-chraoladh agad-fheìn a dhèanamh mu dheidhinn na Gàidhlig no dualchas nan Gàidheal (anns a' Ghàidhlig no anns a' Bheurla), no ma dh'fhaoidte an do bheachdaich thu air prògram rèidio agad fhèin ach an do chreid thu gu robh e thar do chomais?

Uill, tha cothrom agad a-nis . . .

Ma tha beachd-smaoin agad airson prògram Guth nan Gaidheal, carson nach bruidhinn thu ruinn mu a deidhinn? Faodaidh tu Program Submission Form iarraidh oirnn. Lìon am foirm agus cuir e air ais thugainn. Faighnichidh am foirm seo bun-cheistean dhut air do bheachd-smuain gus am faigh sinn tuigse nas fheàrr air do mholadh agus bidh na freagairtean cuideachail dhuinn nuair a tha sinn a' dèanamh co-dhùnadh. Ma bheir thu tuilleadh fiosrachaidh dhuinn mu dheidhinn do smaointean, bidh e nas fhasa dhuinn roghainn a chur nam biodh sinn comasach a dhol air adhart.

Chan eil e gu diofair nach eil gnàth-eòlas ann an clàradh-claisneachd agus cinneasachadh prògraman agad oir tha sinn air Program Production Guide (PPG) a sgrìobhadh air do shon. Tha sinn an dòchas gum bi e cuideachail dhut mar leabhran-iùil, far am faigh thu dè na goireasan a bhios ri fhaotainn dhut agus mar sin, dè an seòrsa prògraim is urrainn dhut togail. Agus cuimhnichibh gun urrainn dhuinn taic a thoirt dhuibh am prògram agad a thoirt gu buil.

Ged a bhiodh e taghta nam biodh stiùideo clàraidh aig a h-uile mac màthar, cha bhi feum air uidheam daor a bhith agad — le uidheam shimplidh agus an cuideachadh againn, 's urrainn dhut an gnothach a dhèanamh. Agus, ma bhios e comasach dhuinn, 's urrainn dhut uidheam bunaiteach a gabhail air iasad bhuainn.

An toiseach, briog an ceangal seo gus am Program Submission Form a luadaich a-nuas. Lean am foirm leis an uiread fiosrachaidh sa ghabhas agus cuir e gu gng@acgamerica.org. Ath-sgrùdaidh sinn an innteart agad agus bidh sinn a' seanchas ann am beagan làithean.


Roghainnean an t-seallaidh:
Bho:                
Gu:                
Roinnean-seòrsa:
Òrdugh a rèir:        
Leum gu duilleag:
Inbhir RSS airson na duilleige seo
An deasachadh mu dheireadh: 24mh dhen t-Samhainn 2018 13:42:00