Ulpan faighinn 700K

[Gràisg]

' S ann leis an t-sealladh a bh'aig Daibhidh Grannd a tha an riaghaltas agus BnG a' dol a-nis. '

'On Tuesday the board announced it had agreed in principle to award £702,000 over the next three years to education company Deiseal, which runs courses in Gaelic in Scotland using the “Ulpan” learning method which is based on a way of learning Hebrew. It has also been used for teaching Welsh in Wales, where it is called Wplan.'

'Game over' nam bheachdsa ma tha siostam no dad sam bith eile diofraichte agaibh (a thaobh maoineachadh poblach co-dhiù). Ged nach eil Ulpan a' còrdadh riumsa, gur math a thèid leibh a Dhàibhidh.

tuilleadh an seo ma that fhathast ùidh aig duine sam bith:
http://www.pressandjournal.co.uk/Articl ... /?UserKey=
Row erupts at Mod over funding for education
ORGANISATION CLAIMS IT WILL BE ‘WIPED OUT’ BY CASH CUT

[Níall Beag]

Mr MacKay said: “The funding has not been suddenly withdrawn. They are funded until March 2011 and after that we are not prepared to carry on funding as we are not satisfied that they are prepared to work co-operatively with Bord na Gaidhlig and other organisations.
...
“One organisation working on its own without working with others won’t achieve a lot.”

Dé an Gàidhlig a th' air "in a nutshell"?

[Níall Beag]

Seo an sgeul 'sa Gàidhlig agus gun s***-stirring.

[Seonaidh]

Chan eil, smathaid, ach aon chuis bheag an seo. Tha mòran eòlach air stiùiriche Thaic agus thathar ri ràdh gur e duine sònraichte a th' ann: mar as àbhaist, bu toigh le daoine esan no cha bu toigh: chan eil mòran a dh'fhuiricheadh coma leis. Ach cò tha eòlach air stiùiriche Dheasail? 'S ann a tha mise agus tha agam ri radh nach toigh leam na chì mi fhad 's an seo. Tha mar nam biodh modh bhrèige air, mar inneal a bhithear a' cur air is dheth, gun faireachdainn daonna fhoillseachadh no fiù 's bhun modhalachd. Agus mise nam mhatamataigear!

[Deiseal]

[

i]#4)
Re: Ulpan faighinn 700K
by Seonaidh » Thu Oct 14, 2010 10:21 pm

Chan eil, smathaid, ach aon chuis bheag an seo. Tha mòran eòlach air stiùiriche Thaic agus thathar ri ràdh gur e duine sònraichte a th' ann: mar as àbhaist, bu toigh le daoine esan no cha bu toigh: chan eil mòran a dh'fhuiricheadh coma leis. Ach cò tha eòlach air stiùiriche Dheasail? 'S ann a tha mise agus tha agam ri radh nach toigh leam na chì mi fhad 's an seo. Tha mar nam biodh modh bhrèige air, mar inneal a bhithear a' cur air is dheth, gun faireachdainn daonna fhoillseachadh no fiù 's bhun modhalachd. Agus mise nam mhatamataigear![/i]

Cha do thuig mi gu ruige seo gun robh am PR agam cho dona. Mar a thuirt mi air a' fòn o chionn goirid, tha mi an dòchas gu gabh thu mo leisgeul, a Sheònaidh airson càil a tha mi air dèanamh no ràdh a thug oilbheum dhut. Tha badan-doille againn uile, 's cinnteach, agus tha sinn feumach air deagh charaidean son an toirt dar n-aire. Ma tha daoine ann a leughas seo a' faireachdainn mar a tha Seònaidh, carson nach tog thu a' fòn agus bruidhinn rium. Bhinn nad chomain, cha bhreug sin.

Le dùrachdan,

Dàibhidh

f: 01383 829 785
d: daibhidh@deiseal.co.uk

[Deiseal]

'Game over' nam bheachdsa ma tha siostam no dad sam bith eile diofraichte agaibh (a thaobh maoineachadh poblach co-dhiù). Ged nach eil Ulpan a' còrdadh riumsa, gur math a thèid leibh a Dhàibhidh.

Des a charaid,

Bu toil leam cuireadh a chur air luchd-cruthachaidh 'shiostaman no dad sam bith diofraichte' a bhith ag obair còmhla ri Deiseal. Tha Ùlpan - am prìomh chùrsa - rèidh a-nis (taing do Shealbh), ach tha BnaG a-nis a' maoineachadh ghoireasan ùra do dh'oileanaich agus dh'oidean agus trèanadh 400 a bharrachd son a theagasg. Ged is brand a th' ann an Ùlpan, 's e co-chur gu math eclectic a th' ann cuideachd. Chuireamaid fàilte air cobhair bho dhaoine làn ùidh air leasachadh teagasg na cànain, gu sònraichte ma tha beachdan-smuain prataigeach aca as urrainnear cur gu feum aig luchd-ionnsachaidh na Gàidhlig. Tha Deiseal an stàirseach linn ùr mar bhuidheann, ach cha bhi na pròiseactan againn soirbheachail às aonais deagh chomhairle, cobhair agus stiùireadh. Chan eil e reusanta a bhith an dùil gun sàbhalaich Ùlpan a' Ghàidhlig ("Game over"), no gun dèan Bòrd na Gàidhlig fhèin an cleas sin fiù 's. (San dol seachad...carson a thathas a' càineadh BnaG gun sguir ag feadhainn, an àite a bhith gan cuideachadh 's a' moladh an euchdan? Lemmings?)

Chan eil mise a' faicinn an t-suidheachaidh a th' againn an-dràsta mar 'iadsan nar n-aghaidh-ne' ann. Tha Ùlpan a' leasachadh lìonradh dhaoine aig a bheil ùidh agus comas sa chànain - m.e. tha 65 ann aig a bheil Gàidhlig o thùs a' faighinn beòshlaint às a teagasg, 45 dhiubh nach robh an sàs ann an teagasg ro thrèanadh mar oide Ùlpan. Tha 112 oidean ann uile gu lèir an-diugh. Agus chaidh seo a lìbhrigeadh aig buidheann de 3.25 FTE - a sgrìobh agus chùm deuchainnean air cùrsa de 216 uairean a thìde agus a sholar 28 cùrsaichean-trèanaidh aig an aon àm... 2006-2010 fhuaras 66% de na chosg Ùlpan ri chruthachadh às an sporan phoblach, agus chuir Deiseal 34% ris an t-sùim seo. Chan fhaigheadh tu riadh mar sin aig banca sam bith as aithne dhomhsa.

Is a' phròiseact, Ùlpan, an seòrsa de cheangail a dh'fheumas sinn eadarainn gus nach sìor-chrìon coimhearsnachd chugallach na luchd-labhairt air sgàth easbhaidh cheanglaichean pearsanta. Nach e sin a tha an làrach-lìn seo agus iomairtean da leithid ag amas air cuideachd? 'S e tòrr lìonraidhean de gach seòrsa, an dàrna fear tron fhear eile, a dh'fheumas cruthachadh gus nach bi ar guthan air call ann an coille na Beurla. Carson nach cleachd a h-uile duine a' chiad lìonradh nàiseanta seo gus lìonraidhean eile a chruthachadh troimhe? Sin ar cuireadh oirbh: Des, Níall Beag (Hai a Néill ), CnaG, An Comunn, Na h-Iomairtean, SMO, Fionnlagh fhèin! Dè dhèanadh ar neart còmhla?

Dìreach an-dràsta tha Deiseal a' sgaoileadh suirbhidh do shampall tuaireamach de dh'oileanaich Ùlpan gus am faigh sinn dàta seasmhach air na th' againn ri dhèanamh son Ùlpan a chur am feabhas dhaibh. Chaidh iongnadh mòr a chur oirnn gun d'fhuair sinn còrr is 195 freagairtean ann an trì làithean (tha an droch thìde gar cuideachadh le seo gun teagamh! Ach co-dhiù). Bidh an aithisg ga h-ullachadh bhon dàta seo agus ga foillseachadh air làraich-lìn ùr Dheiseil sa Bhliadhna Ùir. Bidh suirbhidhean eile ga cumail cuideachd, am measg oidean agus solaraichean-cùrsa. Bidh a h-uile sian a lorgas sinn ri leughadh aig a' phoball 's agadsa fhèin, ma thogras tu, Des. Agus cuiridh sinn an gnìomh na molaidhean as fheumaile do luchd-ionnsachaidh.

Bu toil leam mo thaing a thoirt dhut airson do dheagh guidhe. A bheil pròiseact shònraichte nad cheann an-dràsta a b' urrainn dhuinn còmhradh fhaighinn ma dheidhinn? Cha do thòisich an gèam fhathast, 's dòcha.

Le dùrachdan,

Dàibhidh

[Gràisg]

Halo a Dhàibhidh,

‘S e aiste inntinneach a tha sin. Uill ‘s e teanta mhòr fosgailte dhan mhòr-shluagh a th’agadsa le sanas Bord na Gaidhlig air a mhullach agus bràtach Phlana ur na Gaidhlig ga seideadh sna speuran os a chionn. ‘S e aisling a th’agad a bhalaich, cum a dhol, tha fhios again uile gun tàinig aisling eile agad bu bhith (gu h-ìre). Chuala sibh sa chiad dol a-mach an seo e a chàirdean - Naidheachdan a’ briseadh! Tha an doras aig Dàibhidh fosgailte do Fhionnlagh agus a h-uile neach màthar eile. Gur math a thèid leis an sealladh ùr a th’agadsa.
Chan eil ach aon phròiseact agamsa a Dhaibhidh, agus s’ e sin an stri gus mo chuid comasan labhairt agus sgriobhaidh sa Ghaidhlig a chumail beò anns an coille ud a thug thu iomradh air. Chan eil e furasta, chan eil còmhradh sa Ghàidhlig ri fhaighinn a h-uile latha sa bhaile seo. B’fheairrde dhut a bhith bruidhinn le feadhainn eile chan eil càil a fhios agam ciamar a tha daoine eile a’teagaisg Gaidhlig taobh a-muigh Ulpan ach tha fios agam gu bheil rudeigin a’ dol le Gaidhlig sa dhachaigh ann an Inbhir Narann.
Bòrd na Gàidhlig a’ faighinn caineadh? Uill saoilidh mi gur e rud fallainn a th’ann do democrasaidh fhèin ma tha sin a’ tachairt bho àm gu àm. Tha iad nam pàirt den Righaltas agus chan eil sinn a’ fuireach ann an Korea a tuath. Thug mi sùil air am plana ùr-ùr ud ach cha do leugh mi e gu mionaideach. A bheil e feumail no a bheil e airidh air caineadh? Cò aig a tha fios? Chì sinn aig cheann fichead bliadhna ‘s dòcha no ma thilleas na Labaraich am faic sin plana ùr, ùr, ùr a bhios freagarrach do na poilitaigs acasan? Co-dhiù tha lan fhios agam gu robh BnG gu seachd sonraichte airidh air càineadh airson an 250k a chaidh a –steach do mobheurla.com agus tha an fheadhainn a rinn an co-dunadh sin fhathast an làthair. An do dh’ionnsaich iad dad?
Uill sin agad e Dàibhidh, saoilidh mi gum bi na lurkers a’ gabhail ùidh mhòr sna falcan agad agus tha mi an dòchas gum bi toradh thighinn as air do shon.

Tiors

[Gordon Wells]

Bu toil leam cuireadh a chur air luchd-cruthachaidh 'shiostaman no dad sam bith diofraichte' a bhith ag obair còmhla ri Deiseal.
Dàibhidh

Dhaibhidh a charaid,

Ma bhios sibh a' tadhal air Fòram na Gàidhlig gu tric 's dòcha gum bi sibh eòlach mar-thà air Guthan nan Eilean - http://guthan.wordpress.com/.

'S e stuth "copyleft" a tha seo - faodaidh duine sam bith a chleachdadh. Ma tha àite ann am feallsanachd Ulpan airson "resource-based independent learning" (faodaidh cuidegin eile Gàidhlig a chur air an jargon sin ma thogras iad) 's dòcha gum biodh e feumail dhuibh. Fiù 's ceangal air an làrach agaibh, 's dòcha?

Leigibh fios dhomh ma tha ùidh agaibh ann.

Dùrachdan,

Gordon

[Níall Beag]

Chuala sibh sa chiad dol a-mach an seo e a chàirdean - Naidheachdan a’ briseadh! Tha an doras aig Dàibhidh fosgailte do Fhionnlagh agus a h-uile neach màthar eile. Gur math a thèid leis an sealladh ùr a th’agadsa.

Dé an "sealladh ùr"? A bheil adhbhar airson smaointinn nach robh e deonach obair a dheanamh ri daoine eile? Chan eil an doigh teagaisg ùlpan mór orm idir, agus mise nach e toilichte gu bheil am facal "ùlpan" anns a h-uile plana, ach chan fhaca mi riamh sian a tha ag radh nach do rinn Daibhidh na thuirt e dhomh: gun robh e a' feuchainn ri bruidhinn ri móran daoine fad na siubhal. If you've got anything to say to the contrary, though, I'd like to hear it.

[Gràisg]

'S dòcha gur e sealladh agamsa ach a' chaid turas a leugh mi na sgrìobh Dàibhidh leugh mi seantans mu dheidhinn 'ar neart còmhla' no rudeigin den leithid? Chan eil e ann a-nis ach co-dhiù.
Bha mi dìreach ri aoir ris a sin agus criomagan eile den 'cri de coeur' a thug Dàibhidh dhuinn ann an dòigh . A h-uile duine ann an saoghal na Gàidhlig ag obair còmhla?, chan eil sin na sealladh ùr idir, 's e aisling gu mì-fhortanach, nach gabh mòran ris. Rudeigin eile a thug m' aire agus thug orm smaoineachadh gur e an litir slan a bha na sheòrsa de sruth-mhic-mheanmainn a bh'ann agus 's e sin:

S e tòrr lìonraidhean de gach seòrsa, an dàrna fear tron fhear eile, a dh'fheumas cruthachadh gus nach bi ar guthan air call ann an coille na Beurla. Carson nach cleachd a h-uile duine a' chiad lìonradh nàiseanta seo gus lìonraidhean eile a chruthachadh troimhe?

An e sealladh a tha sin? Saoilidh mi gu bheil agus cha chuala mi e bho Dhàibhidh gu ruige seo.

A-nis air ais dhan phuing(ean) agamsa. Mar eisimpleir am bi na h-oilthighean deònach a-riamh ag obair le Ulpan?
A bheil mòran deònach an talamh fhèin a' falamh gus blas rudeigin ùr feuchainn - gu h-àraidh an fheadhainn a tha a' togail tuarastal as a' Ghàidhlig? Cha robh mi airson ionnsaigh pearsanta air Dàibhidh a chur an gnìomh agus mas ann mar sin a leugh thu e uill...

Sgrìobh e seòrsa de litir thugamsa a bha fosgailte agus saoilidh mi gur ann ag amas feadhainn fad is farsaing tarraing dhan ghnothaich agus fhreagair mi dha san aon dòigh.
'S docha cha robh e ann san fhreagairt ud ach pìos 'cri de coeur' bhuamsa cuideachd. Aig a cheann thall, a' tilleadh dhan choille ud a-nis gus urram a thoirt do na sgrìobh Niall
He wrote to me, I replied to him but perhaps it really is nothing to do with me in more ways than one. David's letter is a good marker for reflection in many directions. What a pity a few more of the high heid yins in Saoghal na Gàidhlig can't be so candid through the digital outlets.
Again good luck David, sorry I can't be of any use to you - In fact I'd better f*** off and lie down for a while.

[GunChleoc]

Tha mi fhìn toilichte gun do chlàr Daibhidh an-seo agus gu bheil e a' bruidhinn rinn. Bha mi toilichte ann an aon dòigh nuair a thàinig Art a-steach agus nuair a thàinig Fionnlagh na bhall. Tha mi den bheachd gur e call a th' ann a dh'fhalbh Fionnlagh ri fearg ged a bha connspaid ann aig an àm.

Nam bheachd-sa, tha e anabarrach cudromach gum bruidhneas sinn uile ri chèile. Chan eil seo a' ciallachadh gum feum sin uile a' leantainn an aon slighe idir! Cha chreid mi nach bidh sinn nas treasa mar tha iomadach sealladh againn co-dhiù. Tha e cudromach gun cum sinn ar inntinnean agus ar cridhean fosgailte. Chan eil an aon slighe a tha ceart do na h-uile duine ann.

[ArtMacCarmaig]

Tha mi seo, Gun Chleoc. Thuirt mi nuair a ghabh mi ballrachd nach bithinn a' cumail sùil fad an t-siubhail ach gum bithinn a' tadhal an-dràsta 'sa rithist.

Chan eil mise buileach a' tuigsinn nam puingean a th' aig Gràisg. Feumaidh gu bheil eachdraidh air choreigin ann air nach eil mise eòlach.

Tha Ginealach Ùr na Gàidhlig (ged nach do leugh Gràisg e gu mionaideach) stèidhichte air gnìomhan a tha air soirbheachadh ann an dùthchannan eile. Chan eil sin a' ciallachadh gun obraicheadh a h-uile càil ann an Alba, agus bhiodh am Bòrd gu math deònach rudan ùr fheuchainn agus tha mise gu math fosgailte do chòmhradh aig àm sam bith.

Chan eil ann an Ùlpan ach aon ghnìomh a tha a' faotainn taic agus cha bhi an taic sin ann ach airson trì bliadhnaichean. Tha aig Deiseal ri dhearbhadh gu bheil Ùlpan ag obrachadh mar mhodh-teagaisg. Tha a h-uile coltas ann, gu ruige seo, gu bheil agus chan eil e ach glic taic a chumail ris a' chùrsa a leasachadh. Chan eil sin a' ciallachadh nach bitheamaid deònach taic iomchaidh a chumail ri modhan-ionnsachaidh eile cuideachd.

Chan e 'plana ùr' no 'plana ùr, ùr' a th' ann an Ginealach Ùr na Gàidhlig idir. Chan eil dad ann air nach robh sinn ag amas nuair a chaidh Plana Nàiseanta na Gàidhlig fhoillseachadh. Chan eil ann an Ginealach Ùr na Gàidhlig ach drochaid eadar a' phlana nàiseanta a th' againn agus an ath fhear a tha a' toirt dhuinn focas nas treasa air àireamhan luchd-labhairt na Gàidhlig a mheudachadh. Chan eil sin a' ciallachadh a' cur às dhan a h-uile rud eile a tha air a bhith a' tachairt gu ruige seo idir.

Tha mise an dòchas gun soirbheachadh le Ùlpan agus tha mi an dòchas, cuideachd, gu bheil sinn a-nise ann an suidheachadh far am bi na buidhnean Gàidhlig air fad ag obair còmhla. Chan e aisling a tha sin idir. Feumaidh seo tachairt leis gu bheil airgead gu bhith gann son greiseag, agus bi iad air an stiùireadh dhan aon cheann-uidhe.

[An Gobaire]

Tha mise an dòchas gun soirbheachadh le Ùlpan agus tha mi an dòchas, cuideachd, gu bheil sinn a-nise ann an suidheachadh far am bi na buidhnean Gàidhlig air fad ag obair còmhla. Chan e aisling a tha sin idir. Feumaidh seo tachairt leis gu bheil airgead gu bhith gann son greiseag, agus bi iad air an stiùireadh dhan aon cheann-uidhe.

Saoilidh mi gu bheil adhbhar gàirdeachais anns na h-àireamhan de dhaoine a th' air clàrachadh air Ulpan mar thidsearan agus oileanaich. Oir, chan fhada bhon a thòisich an iomairt oideachaidh seo, an taca ris na h-ùine a thathar a' ruith chùrsaichean Gàidhlig eile. A bharrachd air sin, tha e air a bhith a' tarraing dhaoine a dh' aindeoin 's gu bheil aca ri pàigheadh airson a bhith a' clàrachadh nan tidsearan agus nan oileanaich. Mar as fiosrach mi, chan eil cùrsaichean eile air a bhith cho soirbheachail a thaobh àireamhan de dhaoine 's a tha Ulpan; gu mì-fhortanach ge-tà, chan eil dòigh ann fhathast measadh a dhèanamh air dè cho buadhach 's a tha na modhan teagaisg aca. Cha dèanar sin ach le teisteanas bhon t-sluagh a tha, no a bha, a' frithealadh nan cùrsaichean.

'S math gu bheil na buidhnean Gàidhlig gu bhith ag obair còmhla.... far a bheil sin iomchaidh. Ach, cò th' anns na buidhnean Gàidhlig? Dè na buidhnean a th' air an toirt a-steach anns a' phlana seo? Chan ionnan amasan gach buidheann Gàidhlig ri amasan càch a chèile, agus, nach ann gu bheil adhbharan math ann airson sin?

Ciamar a dh'fhaodas na h-aon amasan a bhith aig, mar eisimpleir, Pròiseact nan Ealan agus Pròiseact Thiriodh; no Comhairle nan Leabhraichean agus Tobar an Dualchais? Ged a tha grunn mhath aca agus cuspairean an cuid saothrach a' suathadh ris a' chèile, chan eil suaip daonnan aig cuspair gach dàrna buidheann ri gach buidheann Gàidhlig eile, ach a-mhàin gu bheil còir ann (nam bharail fhèin) a' Ghàidhlig a bhith mar mheadhan conaltraidh anns cha mhòr a h-uile rud a nì iad. Mar sin, chan eil mi a' tuigsinn na tha Bòrd na Gàidhlig a' ciallachadh, nuair a dh'innseas iad gu bheilear ag iarraidh gum bi na buidhnean Gàidhlig uile ag obair fa chomhair an aon cheann-uidhe.

Cha deach gach buidheann Gàidhlig a chur air bhonn mu choinneamh an aon chinn-uidhe sa chiad dol a-mach, agus chaidh gach aon dhiubh a chur air chois aig diofar amannan ann an eachdraidh leasachadh na Gàidhlig. Le sin, cha ruig iad an aon cheann-uidhe aig an aon àm, no aig an aon astar, a chionn 's gun do thòisich cuid dhiubh na bu tràithe na càch. Tha cuid dhiubh a' fàs mall le seann aois agus feadhainn nas òige a' sìor breith orra (ged a tha iad fhathast ann am broilleach na cuideachd); tha cuid fada air thoiseach air a' chòrr agus a' cumail orra a' meudachadh an astair, ach tha cuid eile ann, is iad a' leantainn air druim an fheadhainn a tha air thoiseach orra! Ach, an rud as cudromaiche buileach, chan eil iad uile air an aon slighe co-dhiù. Cha robh riamh, agus 's math nach robh!

'S math nach robh a chionn 's gur e comharradh neart a' chinnich 's an t-sluaigh gu bheil eadar-dhealachadh agus iomadachd ann - chan eil Gàidheil na h-Alba aona-ghuthach an-diugh, agus cha robh riamh. Ged a dh'fheumas aonta agus co-obrachadh a bhith ann airson corra shuidheachaidh, dh'fhaodadh cosgais a barrachd air na bhathar an dùil a bhith ann, ma bheirear a h-uile buidheann fon aon sgiath, no fon aon druim taighe air sgàth caomhnadh airgid.

Tha cunnart ann gun tèid neart cumhachd inntinn is breithneachaidh nan Gàidheal a tha ag obair sna buidhnean seo a mhùchadh le bhith gan ceangal ris an aon mhodh obrach. Tha mi am beachd gu bheil e an còmhnaidh nas fheàrr a bhith a' toirt stiùiridh is taic an lùib saorsa smuain is gnìomha, seach a bhith a' toirt air daoine a bhith ag obair fon aon mhòr fhuaim, a tha ag innse dhaibh dè, cuin, càit agus ciamar a bu chòir dhaibh a bhith a' dèanamh a h-uile sìon.

Ma bhios dà bhuidheann eadar-dhealaichte ann, agus riaghailtean no cumhaichean teann gan ceangal mus faigh iad taic-airgid - dh'fhaodadh nach tig iad gu bhith ach dà chloich nan seasamh nan aonar air udal, seach bithean làidir beò a sheasas còraichean na Gàidhlig 's nan Gàidheal ri gach dùbhlan a bhios ag èirigh romhpa.

[faoileag]

Agus na bithibh a' dìochuimhneachadh gu bheil leasachadh na Gàidhlig, agus ionnsachadh is teagasg na Gàidhlig, ann an àiteachan eile den t-saoghal.

Tha coimhearsnachd luchd na Gàidhlig glè dhèanadach ann an Alba Nuadh, mar eisimpleir, le cùrsaichean de gach seòrsa: TIP, Oilhigh, clàsaichean-oidhche no deireadh-seachdain clasaigeach, cùrsaichean air loidhne/tro Skype - tha barrachd luchd-ionnsachaidh air astar aig AGA na aig SMO.

Cothroman gu leòr a bhith a' bruidhinn ri chèile, ag ionnsachadh bho chèile - agus ag obair còmhla, gu ìre co-dhiù.

Mo bheachdsa tha aon cheann-uidhe - glè fharsaing - againn uile gu dearbh: Gàidhlig a chumail beò, leis an t-sìor bheairteas ioma-thaobhach a th' aice.

[ArtMacCarmaig]

Tha rudan glè mhath a' tachairt ann an Alba Nuadh, le cinnt, agus bu chòir dhuinn sùil a chumail air mar a tha a' dol dhaibh.

Tha mi a' cur fàilte air na thuirt An Gobaire cuideachd. Ged a tha na h-àireamhan de dhaoine a tha a' clàradh airson clasaichean Ùlpan misneachail, chan eil dòigh ann fhathast measadh a dhèanamh air dè cho èifeachdach sa tha Ùlpan mar mhodh teagasg. Coltach ri modh sam bith bhiodh aig gach neach ri tuilleadh a dhèanamh taobh a-muigh nan clasaichean airson an toirt gu fileantachd ach, bhon a tha mi fhìn air fhaicinn gu ruige seo, tha Ùlpan a' toirt toiseach tòiseachaidh glè mhath - agus spionnadh - do dhaoine. Sin an adhbhar a bha air cùl ionmhas a thoirt do Dheiseal airson cùrsaichean a chrìochnachadh agus modhan teagaisg a leasachadh a leigeadh leotha dearbhadh gun obraicheadh Ùlpan.

A thaobh nam buidhnean Gàidhlig ag obair còmhla, mar a thuirt mi, feumaidh seo a' tachairt. Anns a' chiad dol a-mach, nam biodh àiteachan ann - mòr-ionadan - far am b' urrainn do na buidhnean Gàidhlig a bhith còmhla san aon thogalach, 's e cothrom a bhiodh ann dhaibh còmhradh ri càch a-chèile. A bharrachd air sin tha dùbhlan air a bhith air a chur ro gach buidheann a tha a' faighinn maoin bhliadhnail bho Bhòrd na Gàidhlig breithneachadh air mar a dh'fhaodadh iad a bhith an-sàs san iomairt againn àireamhan luchd-labhairt a mheudachadh. Chan eil seo ann an dòigh sam bith a' ciallachadh gum biodh aca ris an cùl a chur ri rudan a tha soirbheachail mar thà. Tha cothroman cleachdaidh agus pròiseactan airson inbhe na Gàidhlig a thogail gu bhith a cheart cho cudromach aon uair 's gum bi barrachd dhaoine ga bruidhinn. Ach tha a' mhòr chuid de na buidhnean air dearbhadh gum biodh e comasach dhaibh obair a bharrachd, no obair eadar-dhealaichte, a dhèanamh airson a' cur ris an iomairt a thaobh àireamhan.

Tha mi fhìn a' faicinn dòighean anns am b' urrainn do gach buidheann Gàidhlig a bhith air an aon shlighe fharsaing air an robh Faoileag a-mach. Chan ann a-mhàin mu dheidhinn àireamhan a tha seo idir ach dèanamh cinnteach gum mair a' Ghàidhlig, gum biodh daoine a tha ga h-ionnsachadh a faighinn cothrom a bhith còmhla ri feadhainn a tha fhìor fhileanta airson an cuid sgilean a thoirt air adhart, agus gum biodh cothroman ionnsachaidh agus cleachdaidh aig daoine.